Suyultirilgan gaz ta’minoti tizimi isloh qilinadi – ehtiyojmand oilalarga kompensatsiya beriladi
Prezident Shavkat Mirziyoyev aholini suyultirilgan gaz bilan ta’minlash tizimini isloh qilish bo‘yicha takliflar taqdimoti bilan tanishdi.
Joriy yilda ular ehtiyoji uchun 604,8 ming tonna suyultirilgan gaz yetkazib berish rejalashtirilgan.
Tahlillarga ko‘ra, ayrim hududlarda suyultirilgan gaz o‘z vaqtida yetkazib berilmayapti. Uni 46 kundan ortiq muddatda olayotgan iste’molchilar ulushi 22 foizni tashkil etmoqda.
Tizimni isloh qilish doirasida “Hududgazta’minot” ta’sischiligida “LPG-Trade” MCHJni tashkil etish taklif qilindi. Yangi tuzilma suyultirilgan gazni birja orqali xarid qilib, aholiga yetkazib berish bilan shug‘ullanishi ko‘zda tutilmoqda.
Shuningdek, suyultirilgan gaz narxini iqtisodiy asoslangan mexanizmlar asosida shakllantirish, bunda ijtimoiy himoyaga muhtoj oilalarga xarid qilingan gazning har bir kilogrammi uchun kompensatsiya to‘lash taklif etildi.
Xususiy operatorlarni jalb qilish bo‘yicha ilk pilot loyiha Andijon viloyatida amalga oshirilishi rejalashtirilgan. Keyinchalik tajribani boshqa hududlarda ham bosqichma-bosqich joriy etish imkoniyati ko‘rib chiqiladi.
Prezident suyultirilgan gazni yetkazib berish muddatlarini qisqartirish, hisob-kitoblarni raqamlashtirish, taqsimotda shaffoflikni ta’minlash, sun’iy taqchillik va asossiz narx oshishining oldini olish bo‘yicha topshiriqlar berdi.
