Raqobat qo‘mitasi aviareyslar kechikishi uchun kompensatsiya to‘lash masalasini o‘rganmoqda
2026-yilning birinchi yarmida havo transporti xizmatlari bo‘yicha iste’molchilar murojaatlari o‘tgan yilning mos davriga nisbatan 4,1 barobar oshib, 300 tadan ortiqni tashkil etgan.
Murojaatlarda reyslarning bir necha soatga kechikishi, yo‘lovchilarga o‘z vaqtida aniq axborot berilmasligi, sifatsiz xizmat ko‘rsatilishi hamda ko‘rsatilmagan xizmatlar uchun haq undirilishi kabi holatlar qayd etilgan.
Raqobat qo‘mitasi tahliliga ko‘ra, ayrim hollarda tashuvchining aybi bilan kechikkan reyslar bo‘yicha yo‘lovchilarga kompensatsiya yoki muqobil yechim taklif etilmagan.
Shu munosabat bilan Qo‘mita mahalliy aviareyslar tashuvchining aybi bilan kechikkanida yo‘lovchilarga kompensatsiya to‘lanishi va iste’molchilar huquqlariga rioya etilishi holatlarini o‘rganmoqda.
Shuningdek, aviakompaniyalardan raqamli platformalardagi ma’lumotlarni to‘liq taqdim etish va ularni qonunchilik talablariga muvofiqlashtirish so‘ralgan.
