Mutasaddilar Toshkent jamoat transporti tariflarini oshirish loyihasiga izoh berdi

Avval xabar berganimizdek, Toshkentda 1-oktabrdan avtobus va metroda elektron to‘lov uchun yo‘l haqini 1 700 so‘mdan 2 500 so‘mga oshirish taklif etilgan. Mazkur loyiha yuzasidan Transport vazirligi izoh berdi.

Qayd etilishicha, poytaxt jamoat transporti har kuni qariyb 2,5 mln yo‘lovchiga xizmat ko‘rsatadi. So‘nggi yillarda avtobuslar soni qariyb ikki barobar oshib, 1 900 taga yaqinlashgan, o‘rtacha qatnov oralig‘i esa 30 daqiqadan 15 daqiqagacha qisqargan.

Vazirlikka ko‘ra, amaldagi tarif tashuvchilarning barcha xarajatlarini qoplamaydi. Ular qatoriga haydovchi va texnik xodimlar ish haqi, yoqilg‘i va elektr energiyasi, ehtiyot qismlar, ta’mirlash, depo va quvvatlantirish infratuzilmasi, tozalash, navigatsiya hamda elektron to‘lov tizimlarini saqlash xarajatlari kiradi. Xarajatlarning bir qismi davlat budjeti hisobidan moliyalashtirilmoqda.

Shuningdek, tarif o‘zgarishi bilan birga tashuvchilarga qatnovlar muntazamligi, transport vositalarining texnik holati va tozaligi, yo‘lovchilar xavfsizligi hamda xizmat sifati bo‘yicha talablarni kuchaytirish zarurligi ta’kidlangan.

Hozircha tariflarni oshirish bo‘yicha yakuniy qaror qabul qilinmagan. Loyiha 19-sentabrga qadar jamoatchilik muhokamasida bo‘ladi.