Raqobat qo‘mitasi onlayn platformalarni reklama talablariga rioya qilish yuzasidan ogohlantirdi

Raqobatni rivojlantirish va iste’molchilar huquqlarini himoya qilish qo‘mitasi OAV, ijtimoiy tarmoqlardagi guruh va kanal ma’murlari, blogerlar, vaynerlar hamda boshqa internet faollarini reklama sohasidagi qonunchilik talablariga qat’iy rioya qilishga chaqirdi.

“Reklama to‘g‘risida”gi Qonunga ko‘ra, reklama boshqa axborotdan “reklama” yoki “reklama huquqi asosida” degan belgi bilan aniq ajratilishi kerak. Tahliliy maqola, sharh, fikr yoki boshqa material tijorat maqsadini ko‘zlasa, u ham reklama sifatida belgilanishi lozim.

Qo‘mita ayrim hollarda tijorat mazmunidagi materiallar oddiy axborot sifatida taqdim etilayotgani, ularni reklama ekanini ko‘rsatuvchi tegishli belgilarsiz tarqatish holatlari uchrayotganini qayd etdi.

Ma’lumotga ko‘ra, o‘tgan davrda reklama qonunchiligi talablarini buzgan 20 dan ortiq ijtimoiy tarmoq guruhi va kanali ma’murlari, blogerlar, vaynerlar hamda boshqa tarmoq faollariga tegishli ta’sir choralari qo‘llanilgan.

Qo‘mita reklama materiallarini tayyorlash va tarqatishda qonunchilik talablariga rioya etilmasa, belgilangan tartibda choralar ko‘rilishini eslatdi.